Higjiena intime: Mikrobiota dhe përkujdesjet e duhura pastruese për të ruajtur ekuilibrin e saj
Zona intime e gruas është një pjesë jashtëzakonisht e ndjeshme e trupit, që kërkon kujdes të veçantë dhe produkte të buta, të formuluara për të ruajtur ekuilibrin natyral të pH-së dhe mikrobiotës intime. Shpesh mendohet se pastrimi i shpeshtë është shenjë pastërtie, por në fakt, edhe mungesa e higjienës, edhe teprimi me larjet ose përdorimi i produkteve agresive mund të prishin këtë ekuilibër delikat. Kur flora intime çekuilibrohet, rritet rreziku për irritime, infeksione dhe parehati që ndikojnë drejtpërdrejt në mirëqenien e përditshme.
Mikrobiota e zonës intime është një sistem i ndërlikuar, i përbërë nga shumë lloje bakteresh, ku rolin kryesor e kanë laktobacilet, “rojtarët” e ekuilibrit. Këto baktere të dobishme mbrojnë kundër mikrobeve të dëmshme dhe ndihmojnë në ruajtjen e një mjedisi të shëndetshëm vaginal. Kur numri i tyre bie, shfaqen më lehtë infeksione si mykozat apo vaginozat bakteriale, të cilat shoqërohen me kruarje, irritim, erë të pakëndshme dhe sekrecione jonormale.
Kujdesi i duhur për zonën intime nuk lidhet vetëm me ndjesinë e pastërtisë, por me shëndetin e përgjithshëm të gruas. Një higjienë e balancuar ndihmon në ruajtjen e florës mbrojtëse, e cila funksionon si barrierë natyrale ndaj baktereve të dëmshme. Në periudha të caktuara, si gjatë menstruacioneve, shtatzënisë apo pas trajtimeve me antibiotikë, kjo mbrojtje bëhet më e brishtë, ndaj është thelbësore të përdoren formula të përshtatshme dhe të respektohen disa zakone të rëndësishme ditore si:
· Larja e zonës intime dy herë në ditë, në mëngjes dhe në mbrëmje, është më se e mjaftueshme. Pastrimi i tepruar mund të irritojë mukozën dhe të ndryshojë pH-in natyral.
· Dushet vaginale duhet të përdoren vetëm me rekomandim mjekësor, sepse përdorimi i shpeshtë mund të dëmtojë ekuilibrin e mikrobiotës.
· Pas larjes, zona duhet shpëlarë mirë dhe tharë butësisht. Në rast tharjeje, mund të përdoret një krem hidratues i posaçëm për zonën intime, me përbërës qetësues dhe anti-irritues.
· Gjithashtu, pastrimi duhet bërë gjithmonë me duar të pastra, pasi sfungjerët dhe peshqirët mund të bëhen vatër e shumimit të mikrobeve.
· Të brendshmet duhen ndërruar çdo ditë dhe idealisht të jenë prej pambuku, që lejon perspirimin e lëkurës dhe mbron nga lagështia e tepërt.
· Veshjet shumë të ngushta apo materialet sintetike, përkundrazi, mund të shkaktojnë fërkime, irritime dhe të favorizojnë shumimin e baktereve të dëmshme.
· Gjatë menstruacioneve, është e domosdoshme të ndërrohen rregullisht mjetet mbrojtëse, si pecetat, tamponët apo kupat menstruale, për të shmangur infeksionet.
· Nëse vihen re kruarje, djegie apo sekrecione të pazakonta, nuk duhen përdorur produkte rastësore. Konsultimi me mjekun është mënyra më e sigurt për të gjetur shkakun dhe trajtimin e duhur.
Ekuilibri i mikrobiotës ndikohet nga shumë faktorë, si përdorimi i antibiotikëve, duhani, stresi, ndryshimet hormonale (gjatë shtatzënisë, menopauzës apo kontraceptivëve), si dhe produktet me parfum apo veshjet sintetike. Edhe gjatë ciklit menstrual, pH i vaginës ndryshon natyrshëm, duke e bërë mikrobiotën më të ndjeshme.
Kujdesi intim dhe higjiena e përditshme nuk ka të bëjë me produkte të forta apo larje të vazhdueshme. Sekreti qëndron tek butësia, rregullsia dhe zgjedhja e kujdesshme e formulave të duhura. Trupi i gruas ka një mekanizëm të zgjuar vetërregullues. Detyra jonë është ta mbështesim me zakone të shëndetshme, produkte të posaçme dhe respekt ndaj ekuilibrit natyral që mbron shëndetin tonë intim.
